喂!老細你知唔知,就算你淨係請個parttime,或者個工仔淨係幫你兩三個鐘,都一定要買勞工保險(簡稱「勞保」)㗎!唔買係犯法㗎!咁到底咩係勞保?買咗有咩保障?唔買又會點?講經MAN即刻幫你解構清楚,懶人包一take過答曬你啲問題!
【相關閱讀】
醫療保險、自願醫保計劃、意外保險……邊款啱?退休後長者保險,甘樣揀更抵諗!
咩係勞工保險?員工有咩保障?
所謂「勞保」,其實就係指 僱員補償保險(Employees’ Compensation Insurance)。呢個保險係根據香港《僱員補償條例》而設,主要保障員工因為工傷、職業病,甚至意外身亡嘅情況,僱主要賠償就靠佢啦!
唔買勞保會點?犯法㗎!
僱主必須買勞保
無論你啲員工係全職定兼職、長工定短工,甚至係要飛出香港出差,僱主都一定要幫佢哋買勞保。根據法例第282章《僱員補償條例》第40條規定,呢個責任係唔可以豁免㗎!
違法後果幾嚴重?
1. 罰款高達 $10萬!
2. 坐監兩年!
3. 仲要畀補償援助基金管理局巨額附加費!
講個真實case:有僱主因為冇買勞保,畀人罰咗 $16萬附加費,仲要坐監半年!所以,各位老細 唔好為咗慳少少錢搞到自己賠大錢啦!
豁免情況
以下情況,僱主可以唔使買勞保:
1.臨時工:但如果係家務助理或者幫手做正行嘅,咁就冇得豁免喇。
2.外發工:即係員工喺機構範圍以外工作。
3.無薪嘅家人:例如同住嘅家庭成員,但冇工資。
勞工保險嘅保障範圍有幾大?
簡單講,條例只要求保障工傷、職業病、死亡,但點樣保障要睇僱主同保險公司點傾。以下係幾個行業嘅例子:
1. 運輸行業:例如貨車司機搬貨時肌肉拉傷,或者交通意外。
2. 飲食行業:好似廚師燙親、切菜時割親。
另外,政府仲列咗一啲指定職業病,如果因工作患上以下病症,都可以賠償:
1.職業性失聰:長期處高噪音環境,地盤工人、裝修師傅最易中招。
2.腱鞘炎:長期重複手部動作,例如廚師、清潔阿姐。
3.退伍軍人病:清水塔、水池嗰啲工種。
4.結核病:醫護人員特別高風險。
發生工傷!僱員同僱主要做啲乜?
僱員方面
1. 即刻通知老細,唔好扮硬淨!用口頭或者書面形式都得。
2. 去醫院求診,攞齊病假紙同醫療單據,幫老細向勞工處呈報。
3. 跟醫生指示,好好休息,唔好諗住偷雞做嘢賺錢,自己身體唔值錢咩?
僱主方面
1. 收到通知後,14日內呈報勞工處,唔做罰你$5萬!
2. 要畀工傷病假錢,計法係(工傷前人工-意外後人工)x 4/5。
3. 21日內補償醫療費,仲要簽發補償證明畀員工。
4. 有懷疑個case,可以搵註冊醫生檢查,但記住要第一時間通知保險公司!
點樣向保險公司索償?
1. 先賠僱員:冇得拖拖拉拉。
2. 準備文件:要有病假紙、醫療收據、報工傷表格副本。
3. 正式索賠:跟保險公司程序,唔明就問代理啦!
以下是詳細表格列名不同工傷意外的呈報期限、補償方式及需要填妥的表格:
事故性質 | 申報期限 | 補償方式 | 表格 |
因工傷意外導致暫時喪失工作能力,為期不超過3天 | 14天 | 僱主直接支付補償(即工傷病假錢)及有關的醫療費用 | 表格2B |
因工傷意外導致暫時喪失工作能力,為期超過3天但不超過7天 | 僱主及僱員可按法例協議補償及醫療 費用。 | 表格2 | |
因工傷意外導致喪失工作能力,為期超過3天 | 勞工處處長會評估根據條例須付的補償,並會給僱主及僱員簽發一份列明補償款額的補償評估證明書。 暫時喪失工作能力補償評估證明書會在僱員辦妥工傷病假跟進手 續後發出。 永久地全部或部分喪失工作能力僱員將被轉介至僱員補償評估委員會接受判傷,而補償評估證明書須待僱員補償評估委員會簽發評估證明書後才簽發。 | 表格2A | |
因工傷意外導致死亡 | 7天 | ||
因患上職業病導致喪失工作能力 | 14天 | ||
因患上職業病導致死亡 | 7天 |
勞工保險醫療費上限一次過話你知 !
勞工保險保障範圍其實好全面,由工傷意外死亡嘅補償金、殯殮費、醫療費,到因工傷導致永久喪失工作能力嘅賠償金額都有得計。不過,賠幾多就視乎實際情況,唔係一刀切㗎!特別係醫療費,仲有明確嘅每日上限,僱主係要按以下嘅金額向員工支付:
- 住院治療:每日最多 $300
- 非住院治療:每日最多 $300
- 同日住院兼非住院治療:每日最多 $370
*欲了解更多賠償金額詳情,可參閱勞工處僱員補償條例頁面中有關補償項目的部分。
咁啲數字聽落似乎OK,但作為僱主,就千祈唔好覺得自己係「買少見少」。點解?因為如果醫療費爆晒額,你係要自掏腰包幫補,多餘嘅部分保險唔包,得靠自己!
勞工保險常見問題一次睇曬!
1. 購買勞工保險有咩要留意?
購買前要注意咩?
僱主喺買勞工保險之前,應該評估自己行業內員工面對嘅風險,例如地盤工人可能有墮樓風險,飲食業員工可能有燙傷嘅情況。選擇保險公司時,要確認保單有冇包括所需保障。
買保險嘅時候點樣同保險公司溝通?
確保清楚列明所有員工嘅工資、工作地點同工作性質。如果有外判工作,都要講明需要涵蓋承判商嘅員工。防止日後有爭拗。
買咗之後要做咩?
如果公司請多咗員工,要盡快通知保險公司更新承保範圍。另外,記得定期檢查保單期限,唔好俾保障斷咗,因為中途冇保險係犯法嘅!
2. 外傭需唔需要買勞工保險?
需要!外傭都係受《僱傭條例》同《僱員補償條例》保障嘅,無論佢係全職定兼職,都要為佢買勞工保險。如果僱主唔買,就會觸犯法例,可能面臨罰款甚至監禁,絕對唔好懶。
3. 僱員點知道僱主有冇買勞工保險?
根據法例,僱主需要喺工作場所顯眼位置貼出勞工保險通告,列明保單嘅細則。僱員如果懷疑僱主無買,可以問HR或者上司,甚至直接聯絡勞工處查詢。
4. 僱主可以點樣慳勞工保險保費?
雖然買勞工保險係法例要求,但僱主可以透過以下方法減低保費:
- 提升工作場所安全: 裝設合乎安全標準嘅設備,例如防墮網、標誌清晰嘅緊急出口等。
- 定期維修設備: 確保所有器材運作正常,減少工傷機會。
- 提供安全訓練: 定期舉辦職業安全課程,提升員工嘅安全意識。
做得好,保險公司通常會願意提供優惠!
5. 如果被保險公司拒絕投保勞工保險點算?
高危行業例如建築或者運輸,有時會難買到勞工保險。如果你畀三間保險公司拒絕投保,或者保費高到比市場標準超過30%,可以考慮參加「僱員補償聯保計劃」。呢個計劃專為高風險行業提供支援,幫僱主解決無保險嘅困難。
6. 如果公司嘅保險中斷咗,會有咩後果?
一旦勞工保險中斷,任何期間內發生嘅工傷意外,僱主都要自掏腰包賠償,仲有可能面對法律責任!所以一定要喺保險到期之前續保,唔好俾保障有「斷層」。
投保有責,賠償合理,老細唔使驚,打工仔都唔怕!有勞保喺手,大家都可以安心返工啦!