【強積金供款】你想知嘅MPF問題一文睇晒:供幾多?提早拎?

強積金係咩嚟?

強積金英文叫 Mandatory Provident Fund(MPF),係香港嘅一個退休保障計劃,自2000年12月1日正式實行。呢個制度要求18至65歲嘅香港僱員(包括你同老闆)一齊供錢落去,俾大家喺退休嗰陣有啲基本嘅儲蓄。咁供錢係好,但你又知唔知供幾多?仲有無啲細節可以幫你「賺番啲」?  

講經MAN同你一齊嚟解構強積金,幫大家將呢個「退休儲蓄工具」摸清楚!  

香港強積金制度嘅背景  

政府統計處曾經估計,到2069年,65歲以上嘅人口比例會升到35%,即每三個人有一個係老人家,仲要平均壽命都大大增加!男性可以活到88.4歲,女性更加勁,平均93.9歲。  

而家嘅就業人口供養退休人士比例係3.4人供養一個人,但到時會縮水成1.7個人養一個人。講真,未來退休生活壓力一定大,強積金制度就係希望大家趁年輕打工時慢慢儲,保障65歲後「袋袋平安」。  

咩人要供強積金?兼職要唔要供?  

1. 僱員

  • 18歲至64歲全職/兼職打工仔,受僱滿60日以上就要供。  
  • 如果係建造業或飲食業,按日計糧、少於60日嘅臨時工都要供。  

2. 自僱人士  

自己開工自己搵食嘅朋友,都要供MPF。  

豁免供款人士包括  

  • 未滿18歲或年屆65歲的僱員及自僱人士
  • 家務僱員
  • 自僱小販
  • 受法定退休金計劃或公積金計劃保障的人士(如公務員或津貼及補助學校的教員)
  • 獲發強積金豁免證明書的職業退休計劃的成員
  • 獲准按照《入境條例》第11條來港工作及(1)獲准留港不超過13個月或(2)是某個在香港以外地方的退休計劃的成員的人士
  • 駐港歐洲聯盟屬下歐洲委員會辦事處的僱員  

入息幾多先要供強積金?點計?  

按月支薪僱員供款計法:  

  • 低於$7,100: 僱主供有關入息5%,你無需供。  
  • $7,100至$30,000: 僱主同僱員都各供5%。  
  • 超過$30,000: 每方最多供$1,500。  

非按月支薪僱員供款計法:  

  • 低於下限($280 x 糧期日數): 僱主供有關入息5%,你無需供。  
  • 介乎上、下限之間: 僱主同僱員都各供5%。  
  • 超過上限($1,000 x 糧期日數):上限 x 5%,上限 x 5%

強積金有無供款上限?  

有嘅!供款上限係每月$1,500,即使你月入百萬,都係供咁多,咁有啲人可能會考慮其他投資渠道嚟補足退休儲蓄需要。  

新入職幾時開始供強積金?  

新入職首60日內,屬免供期,唔洗供款。但60日後,老細需要喺下一個供款日或之前開始支付,即係每月10號前完成。記住,免供期唔等於唔供,遲早要做!  

自僱人士供款詳情  

自僱人士需要供MPF,供款額為收入的5%,並受最低及最高有關入息水平的限制。

  • 月薪低於$7,100(或每年$85,200)無需供款。  
  • 月薪$7,100至$30,000(或每年$85,200至$360,000) 供5%。  
  • 月薪超過$30,000(或每年$360,000) 每月最多供$1,500。  

自僱人士可選擇按月或按年在供款日或之前作出供款。

  • 按月供款: 自己揀每月供款日,例如每月尾日,咁供款期就係由每月1號至31號。  
  • 按年供款: 供款日是強積金計劃財政年度的最後一日,並須在財政年度結束當日或之前作出供款。  

咁可扣稅自願性供款(TVC)又點玩?  

有心儲多啲退休金嘅話,可以考慮 TVC(Tax Deductible Voluntary Contributions),唔單止儲多啲,仲可以俾你報稅時扣稅,一舉兩得!  

TVC優點包括:  

1. 方便: 自己揀供幾多,靈活加減,想停就停。  

2. 清晰: 強積金受託人每年提供供款記錄,好易報稅。  

3. 靈活: 隨時轉去其他強積金計劃。  

有咩情況可以提早提取強積金?  

1. 提早退休(60歲): 唔再工作,仲要簽聲明。  

2. 永久離港: 證明唔會返香港定居。  

3. 完全喪失行為能力/罹患末期病: 提供醫學證明。  

4. 小額結餘: 餘額少過$5,000,而且離開供款期最少12個月。  

5. 成員死亡: 強積金成為遺產,由遺產代理人申索。  

貼心提醒

強積金唔係即時見效嘅工具,但對於退休生活好重要。如果你未有習慣定期睇自己戶口或者了解供款計劃,真係要檢討吓啦!

希望講經MAN呢篇懶人包幫到大家全面掌握強積金制度! 錢關重要,早啲打好退休後着數局! 

發佈留言

發佈留言必須填寫的電子郵件地址不會公開。 必填欄位標示為 *