講起「股神」巴菲特，港人可能會覺得同我哋距離好遠，但其實佢嘅投資理念好值得学习。喺瞬息萬變嘅時代，大家成日諗住賺快錢，但巴菲特係提倡價值投資，玩耐性同控好風險。講經MAN就嚟同大家研究下巴菲特嘅投資理念同佢啲「神操作」，睇吓點樣喺股市上行穩致遠。
巴菲特嘅傳奇故事
1950年代，巴菲特喺哥倫比亞大學讀書，拜咗「價值投資之父」本傑明·格雷厄姆做師傅，跟住開始研究點樣以「買平嘢」心態喺股市入市。之後，佢創辦伯克希爾·哈撒韋公司，逐步從一家衰落嘅紡織廠變成咗全球最強投資公司之一。
57年超過360萬倍嘅驚人回報
巴菲特自1965年接手伯克希爾以來，平均每年回報率達20.1%。試諗下，呢個數字唔只高過標普500指數，仲將初始資金升值到超360萬倍！
睇佢手上啲股票，更加令人佩服：
- 可口可樂（Coca-Cola）當年用13億美金買入，2022年光係股息已經收返7.04億美金；
- 美國運通（American Express）1995年買入嘅時候，股息喺4100萬美金，而家跳到3.02億美金！
呢啲回報，真係無得頂。重點係，佢從來唔追高，堅持買啲長遠有價值嘅嘢。
「股神」嘅3M投資秘笈
巴菲特嘅成功唔係靠運氣，而係靠一套簡單但有效嘅方法——佢稱為3M原則：
1. Management（管理層）
巴菲特好重視公司嘅管理層，因為一班有遠見、識執行嘅領導，先可以帶領公司贏得未來。佢會睇清楚管理層嘅財技、決策能力同價值觀，確保啲人係穩陣可靠。
延伸閱讀：
2. Moat（護城河）
護城河就係一家公司嘅競爭優勢，好似品牌、技術專利、成本優勢咁，呢啲嘢可以阻止對手打入市場。例如，可口可樂嘅品牌影響力，簡直係全球獨一無二，點睇都係長期穩定嘅好選擇。
3. Margin of Safety（安全邊際）
簡單啲嚟講，就係買平唔買貴。巴菲特會評估一隻股票嘅內在價值，確保自己有足夠嘅「底褲」應付股價波動，唔會因為市場情緒而手忙腳亂。
價值投資心法：慢慢嚟，好戲係後頭
巴菲特投資哲學就係「買得啱，坐得穩」，唔好追求短期利益，而係專注於公司嘅長期發展潛力。
1.關注企業財務指標
巴菲特會仔細分析企業嘅財務狀況，包括營收、盈利、現金流、資產負債表等，從而估算企業嘅真實價值。再從企業嘅競爭優勢、利潤增長同市場佔有率，選擇財務穩健、增長潛力大嘅公司。
2.關注低估值股票
巴菲特係價值投資大師，佢會根據企業嘅基本面分析，睇下啲股票係咪被市場低估。如果發現低估值股票，就會選擇買入，並持有耐心，等價值逐步釋放。
3.長期持有
巴菲特強調長期持有嘅重要性，佢通常唔會為咗短期波動而賣出股票，而係專注於企業嘅長期增長。佢認為，長期持有可以避開短期市場波動，減少交易成本，同時獲得穩定嘅回報。
巴菲特持股 / 波克夏持股名單（截至2024年10月）
巴菲特而家持有嘅公司，唔單止涵蓋傳產行業，仲有唔少科技股。截至2024年10月31日，巴菲特當前持倉市值一共係2943.24億美金。
- 計算機業（30.19%）
- 非銀金融（20.58%）
- 食品飲料（12.30%）
- 銀行（11.97%）
- 采掘（11.67%）
- 其他（13.29%）
巴菲特十大持股佔比高達83.76%，呢個比例唔單止反映佢對自己投資組合嘅控製性強，仲顯示佢對呢啲企業有極大信心。換句話講，巴菲特認為，呢10間公司有著極高嘅投資價值，值得佢大手筆投資。不過，從另一個角度嚟睇，巴菲特嘅投資組合其實分散性唔算高，因為佢大部分嘅資金集中喺呢10間公司，如果有一間表現唔如預期，可能會大大影響整體回報，風險自然就加大。
1. 蘋果（Apple）- 29.42%
蘋果係巴菲特目前最大嘅持股，佔咗29.42%。巴菲特對蘋果嘅投資可以話係非常有信心，因為蘋果唔單止係全球科技巨頭，仲係全球市場上富具實力品牌之一。巴菲特曾經講過，如果有人畀你1萬美元，但條件係要將你嘅iPhone交出來，你根本唔會接受。蘋果用戶黏性高，擁有一班忠實粉絲。巴菲特仲直言蘋果係「比其他所有我擁有嘅企業都好」。
但奇怪嘅係，雖然蘋果一直表現強勁，巴菲特近年卻連續減持蘋果股票，減持幅度高達67%，持股數量由9.05億股下降至3億股。呢啲減持嘅步伐係由2023年第四季開始，當時巴菲特減持咗1,000萬股，而2024年1季度更減持咗1.16億股，降幅達13%。佢嘅減持唔係因為蘋果唔好，而係基於兩個原因：第一，為咗減少稅務負擔，第二，巴菲特本身對高科技股嘅偏好冇咁強，佢一向鐘意穩定回報嘅傳統行業。
2. 美國運通（American Express）- 11.98%
美國運通（American Express）係巴菲特投資組合嘅第二大持股，佔比11.98%。美運通係巴菲特眼中，一直都係高品質、高效率代表。美運通唔單止係全球最知名信用卡公司之一，仲有強大品牌效應同忠實顧客群，係巴菲特長期持有公司之一。巴菲特曾經話過：“美國運通最重要嘅係品牌，同埋所有渴望同呢個品牌有關聯嘅客戶。”
但係，巴菲特近年都開始減持美國運通股份，原因有可能係對銀行業嘅前景開始有所保留。但整體來講巴菲特對美運通嘅信心依然唔變，認為佢未來仍然有好大嘅增長潛力。
3. 美國銀行（Bank of America）- 10.35%
美國銀行係巴菲特投資組合嘅第三大重倉股，佔比10.35%。多年嚟，巴菲特對銀行股有偏愛，認為銀行係一個相對穩定又能帶來長期回報嘅行業。美國銀行作為美國最大銀行之一，擁有多元化收入來源，例如商業貸款、房屋貸款、手續費、股票承銷等。巴菲特對呢間銀行業務模式非常認同，認為佢有穩定現金流同強大增長潛力。
不過，巴菲特最近開始減持美國銀行股票，從10.33億股減至7.99億股，削減幅度達23%。呢個減持發生喺2024年7月，當時美國銀行公佈財報其實表現唔錯，甚至超過預期。減持可能與美聯儲可能降息有關，因為降息可能對銀行業嘅業績構成壓力。另外，巴菲特可能亦係對美股市場嘅輪動交易有所考量，覺得中小盤股未來可能會有更大嘅表現空間。
4. 可口可樂（Coca-Cola）- 8.54%
可口可樂係巴菲特嘅投資組合中占有穩定位置，佔比8.54%。可口可樂呢個品牌大家都唔陌生，無論係可口可樂、芬達定雪碧，都係全球最受歡迎飲品之一。巴菲特持有可口可樂股票已經長達36年，唔單止因為品牌影響力強，仲因為可口可樂係高股息公司，連續52年都增派股息，穩定回報正係巴菲特鐘意嘅長期投資。
5. 雪佛龍（Chevron）- 6.24%
雪佛龍係全球知名嘅石油和天然氣生產公司，巴菲特投資呢間公司多半係因為佢穩定嘅財務表現同強大競爭力。雪佛龍係能源行業中處於領先地位，擁有穩定現金流同盈利能力，仲係石油行業中最大企業之一。
然而，2024年巴菲特稍微減持咗雪佛龍股票，減持規模唔算大，但依然引起市場關注。甘可能係因為能源市場未來可能面對供應過剩風險，或者巴菲特對石油行業未來增長有啲保留。
6. 西方石油（Occidental Petroleum）- 5.43%
巴菲特最近增持咗西方石油嘅股票，巴菲特對西方石油嘅睇法同雪佛龍有啲相似，都係睇重佢穩定盈利能力同技術優勢。
7. 穆迪（Moody’s）- 3.53%
穆迪係美國三大信用評級機構之一，巴菲特持有呢間公司24年，佔比3.53%。穆迪係一間非常穩定嘅公司，亦係巴菲特最鍾意嘅高股息公司之一。
8. 卡夫亨氏（The Kraft Heinz）- 3.48%
巴菲特同卡夫亨氏嘅關係可以追溯到佢曾經係其最大單一股東，卡夫亨氏擁有眾多知名品牌，巴菲特對呢間公司有信心，因為佢強大品牌影響力同消費者忠誠度。
9. 三菱商事（Mitsubishi Corp）- 2.46%
巴菲特對日本市場非常看好，三菱商事係佢唯一持有嘅外國股票。三菱商事係日本最大綜合商社之一，涉及能源、金屬、汽車等多個行業。
10. 安達保險（Chubb Limited）- 2.33%
安達保險係全球最大產物保險公司之一，巴菲特持有安達保險多年，主要係睇中其穩定現金流同保險業務增長潛力。
巴菲特最新投資佈局：現金為王？
整體來講，巴菲特最近投資策略有啲新轉變，唔再一味進取，反而有啲保守——「現金為王」！呢個季度，整體佈局好明顯係「縮水」模式。據報導，巴菲特手上嘅股票倉位已經連續三個季度下跌，總市值由3320億美元跌至2943.24億美元。相對地，現金儲備大幅攀升，從年初1680億美元，高額增長至3252億美元，差唔多翻倍。
大量現金儲備，對未來經濟不太樂觀？
咁多現金儲備，唔少市場人士開始猜測，巴菲特可能對美國經濟未來有啲擔心，尤其喺2024年8月5號嘅股災似乎係個警號。好多分析都認為，巴菲特此舉係想準備一個「防守性」策略，將資金轉成現金，唔單止係為咗應對市場波動，仲可能係針對未來可能嘅經濟衰退。
暫停股票回購：巴菲特對美股態度謹慎
再者，巴菲特仲做咗一個相當罕見嘅決定──佢自2018年以來，第一次選擇暫停回購自家股票。回購股票一直係巴菲特一個相當鐘意嘅操作，因為回購可以提高每股盈餘，進一步提升股東價值。但今次佢決定唔再繼續回購，睇來係對自家股票的吸引力有啲疑問，或者講得更直白啲，巴菲特可能覺得美股有啲過熱，唔係一個適合「高位」回購嘅時候。佢對美股未來嘅走勢，似乎變得相當謹慎，唔再咁大膽投入。
94歲高齡：巴菲特為接班人Greg Abel準備？
但唔好忘記，巴菲特而家已經94歲啦！因此，坊間都開始討論，呢啲現金儲備有可能係巴菲特為接班人──Greg Abel準備。大家都知道，巴菲特唔止係一個投資大亨，仲係一個企業家，佢肯定唔想將嚴重嘅資產交接問題拖延到最後一刻。咁大筆現金，可能就係為接班期間更加順利，確保佢將來交接時，唔單止係有足夠資源過渡，仲要確保下一代可以順利接手，免得出現麻煩。
巴菲特減持背後原因小總結
- 減少稅務開支：巴菲特一向注重稅務規劃，減持可能係為咗減少資本利得稅等相關稅負。
- 對科技股有疑慮：近年巴菲特對高科技股持保留態度，可能覺得佢哋嘅估值過高，風險偏大，更偏好投資傳統行業嘅穩定回報。
- 美國經濟指標拉響警報：美國嘅非農就業數據、CPI（消費者物價指數）、PPI（生產者物價指數）等經濟指標顯示，美國經濟可能會面對更多挑戰，巴菲特可能有意減少風險。
- 市場過熱：股市的表現過熱，巴菲特認為現時市況可能唔係最佳入市時機，因此選擇保守策略。
- 為接班人過渡：巴菲特年紀已經唔細，將來的接班人Greg Abel需要足夠嘅資金支持，所以現金儲備大增，可能係為咗確保未來交接過程順利。
總括嚟講，巴菲特畀我哋嘅啟發係投資唔一定要快，但一定要穩。學識佢嘅投資理念，努力係人生財富上跑贏市場！下次再炒股之前，記得問下自己：我搵到「護城河」未？有無「安全邊際」保護自己？如果答案係Yes，講經MAN恭喜你，成功就離你唔遠喇！