想像一下，員工每日都幹勁十足、目標清晰，而且佢地嘅目標唔單止係來自上司嘅要求，而係可以自己參與制定。甘樣嘅工作模式係咪會令員工更投入、更有動力呢？答案當然係肯定啦！
呢個就係講經MAN要同大家分享MBO嘅原因啦！
何謂MBO？點解咁多人推崇？
MBO 全寫係 Management by Objectives即係目標管理。簡單嚟講MBO 就係一套以目標為核心嘅管理方法，旨在幫助公司提升運作效率，確保每位員工都專注去達成同公司大方向一致嘅目標。
根據專家分析，當員工明白自己嘅工作目標點樣同公司整體發展緊密相連，佢哋會更有動力去做事，亦會因為目標清晰而提升工作表現。換句話講，MBO 就係透過設定清晰嘅目標，幫助公司同員工實現雙贏，做好企業管理。
MBO嘅三大核心
1. 定立目標：無論係公司整體目標定係各部門嘅個別目標，都要同公司嘅大方向一致。呢一步可以令每個人都清楚自己嘅工作重點，知道自己努力嘅目的係為達成乜目標。
2. 鼓勵員工參與：喺MBO嘅流程中，唔係話上司指派一個目標，員工就硬係要接受。相反，員工應該有機會參與目標嘅制定過程，將自己嘅意見同需求講出嚟，咁樣可以令上司更加了解員工同顧客嘅需要，從而調整目標同發展方向。
3. 畀客觀反饋：定期嘅反饋唔單止係講解員工表現，仲要幫助員工了解自己同目標嘅距離。適當嘅正面反饋可以成為一種鼓勵，激勵員工繼續努力。
想喺企業實踐 MBO？分四步走
1.清晰界定企業核心目標
企業想要實行 MBO，首先管理層要清楚了解企業嘅核心目標，呢啲通常同企業嘅使命、願景有關。因為企業嘅總目標會直接影響到各部門甚至每位員工嘅目標設立。
2.設立 SMART 目標
當企業嘅大方向確定後，每個部門或者員工可以根據自己崗位嘅需要，設定短期目標。可以參考 Peter Drucker 提出嘅 SMART 方法：具體（Specific）、可量化（Measurable）、合適嘅（Acceptable）、現實可行（Realistic）、有時間限制（Time-bound）。按呢個方法，確保目標具體可行。
3.持續追蹤進度
目標設立後，管理層應定期追蹤員工進度，鼓勵佢哋定期檢視自己嘅工作進展，了解同目標嘅距離。咁樣唔只幫助員工認清自己嘅進度，仲令佢哋隨時調整方法，保持專注。
4.畀反饋
一段時間後，上司同下屬應該就目標進行討論，實時反饋員工表現，並共同探討改進方法。咁樣唔單止係表揚，仲可以令員工感受到自己嘅努力被認同。
MBO 實操上嘅限制
員工流失嘅危機
心理學家 Harry Levinson 指出，MBO 過於強調目標與企業大方向嘅一致性，可能會忽略員工個人需求。每個員工都有自己嘅生活理想同職業追求，如果企業目標過於強硬，可能會令員工覺得缺乏成就感，從而萌生離職嘅念頭，增加流失率。
當員工覺得工作同個人目標無關聯，佢哋嘅動力會逐漸消失，工作態度變得敷衍，對企業長遠發展無幫助。更甚者，員工會選擇離開企業，對公司而言係雙重打擊，既要承受培訓成本，又難以留住優秀人才。
MBO 嘅構建與完善？
其實，MBO 唔係完全冇問題，管理層可以改進。理想情況下，每位員工嘅個人需求都可以同企業目標對接，咁樣員工可以滿足自我發展，又可以為公司創造價值。不過呢個理想情況比較難得，管理層可以嘗試喺設立目標時了解員工嘅個人需求，協調企業目標同員工發展需求。
講經MAN貼士
最終，MBO 只係一種企業管理工具，唔一定適合所有企業。每間公司都有自己嘅獨特性，管理層應根據企業文化同員工需求靈活運用，從而達到最佳效果。如果你嘅公司正面對管理挑戰，不妨考慮 MBO，幫助改善團隊管理，同時高效達標。
講經MAN會持續分享更多企業、政經消息，有需要記得 Mark 好！