財富自由對每個人嚟講都有唔同定義，有人覺得要有千萬積蓄先叫自由，有人覺得食飯唔使睇價錢已經夠晒幸福。最近，有網民喺社交平台分享咗一個「港式財富自由等級表」，分咗9個級數，從「凍飲自由」去到「頭等艙自由」，即刻引發大量討論！
等級 1：凍飲自由
港人普通去個茶餐廳凍飲都起碼加$2，有啲加到$3-5都唔出奇，連嗌杯凍飲都要諗諗。但所謂「凍飲自由」就係唔洗理加幾錢，想飲就飲！
等級 2：咖啡自由
普遍打工仔嘅命根，邊個朝早唔靠杯咖啡醒醒神？從即溶到茶記，再由Starbucks到精品咖啡圍返都 $2x-6x 一杯不等。所謂「咖啡自由」可以諗都唔洗諗想手沖飲手沖，想落樓買杯精品咖啡就買！
等級 3：廉航自由
香港人最鐘意周圍飛！但係廉航好多時都要搶飛，行李又要限重，左計右度咁先行得。所謂「廉航自由」就係有機票就飛，唔使怕佢超重定罰款！
等級 4：餐廳自由
所謂「辛苦搵嚟梗係食」能夠隨心所欲食好西，香港地閒閒地食好啲都要一千幾百，所謂「餐廳自由」即係食餐飯唔洗左度右度，又計人均又要ＡＡ，想食就食。
等級 5：包包自由
世界各地既女人都鐘意包包，十萬八萬嘅名牌包用幾年，仲要圍返每年成本抵唔抵用保唔保值。可以隨便見到個包想買就買，明知唔係經典款都照落手，咁樣嘅財富自由又真係幾令人羨慕嘅～
等級 6：商務/頭等艙自由
長途機對好多人黎講都係個考驗，個位鬼死咁窄仲要條腰受苦。達到「頭等艙自由」嘅人，買機票唔需要考慮坐唔坐經濟艙定豪華經濟艙，豪氣坐商務或者頭等艙，出入舒舒服服仲可以優先落機慳時間，點會唔開心？
等級 7：金錢自由
所謂「金錢自由」就係靠收租、利息同其他被動收入已經夠晒維生，搵工！？係咩嚟㗎？應該係唔少港人夢寐以求嘅終極目標。
等級 8：人力自由
「人力自由」呢個Team聽落大癲，意思係請咩人都得，十萬唔夠就百萬，百萬唔夠就千萬，永遠都唔會有「請唔起」，呢種自由真係豪到無朋友。
等級 9：住屋自由
「住屋自由」唔單止係香港有間屋咁簡單，而係世界各地只要你想都可以擁有頂樓豪宅、獨立屋，想住邊就住邊，甚至成條村都可能係你嘅，香港人想有層樓都難，呢個Level 大概係好多人嘅夢想，發夢先敢想～
其實呢，講經MAN認為大家生活壓力大都係現實，但幻想下有啲錢可以隨心所欲，咪當打打氣囉！你又覺得自己係Level幾？