最近講經MAN都有關注新上映嘅《破·地獄》，目前票房已衝破 9000 萬大關，連帶殯儀界「破地獄」師傅都成為熱話！有網民喺討論區發文問：「破地獄師傅人工到底幾多？」即刻掀起熱烈討論，有人話做呢行「日日開工，一場淨賺 18 萬」，仲估計月薪至少 7 萬，甚至話「個個戴勞力士，揸靚車」！究竟實情喺點？
《破．地獄》劇照
破地獄 = 高薪行業？網民內幕大起底！
一眾網民踴躍分享資訊，有人話朋友做殯儀工月薪約 2 萬，搬搬抬抬為主，頭一年靠貼士頂硬上。不過有行內人爆料真正賺錢嘅喺「喃嘸佬、殯儀 Sales 同棺材舖老闆」，估計月入可以高達 20 萬！有位自稱「破地獄師傅」嘅網民更話：「疫情嗰陣日日跳到腳痛，月入穩穩六位數。」
實情錢多都未必咁好賺…
唔少人都話入行靠「關係」，無熟人帶路就難入行，仲要心理質素強。「日日燒香，對住親人傷心場面，你頂唔頂得順？」更何況「破地獄」呢份工喺個夕陽行業，後生一代未必會信呢啲宗教儀式，市場需求其實少咗好多。
仲有網民話呢行「風光背後好多辛酸」，例如長時間吸入煙霧、面對精神壓力，仲要接受社會異樣眼光「明明人工唔錯，但未必人人頂得住」。
破地獄：究竟賺錢定賺命？
話晒《破·地獄》呢套戲講到行內好多故事，其實都影射出呢行嘅「光環」同「代價」。雖然聽落好似月入可以勁高，但實際上又唔喺每個人都啱做，加上行業萎縮、競爭加劇，未來發展都未必樂觀。
你又點睇？喺機會定挑戰？留言講經MAN分享吓你嘅諗法啦～