特朗普效應持續發威，隨著美元上漲，國際黃金價格跌跌不休。講經MAN回顧翻10月29號，黃金價格曾衝上每盎司2776.10美元，係金價登峰時刻！但而家再度回落，最近徘徊喺2606美元左右，搞到唔少人都心頭一驚，咁喺時候「食貨」？定係再等等呢？睇完再做決定啦！
【相關閱讀】
特朗普當選投資氣氛突變！4成港人擔心中美關係惡化升溫 明顯對美股信心大增
國際黃金價格下跌，係咪特朗普現象？
關於呢件事，唔少專家指出，金價下跌唔完全係特朗普當選造成。根據報導，全球貴金屬供應商「賀利氏集團」(Heraeus) 同埋日本貴金屬市場協會 (JBMA) 嘅池水先生都話，金價跌幅同特朗普當選根本冇太大關係。同時，佢講到如果金價短期內唔跌返落2600美元，咁長期支撐價位會係2535.05美元左右。
國際黃金價格下跌兩大關鍵因素
美國金融服務企業 StoneX 集團分析師 Rhona O’Connell 對黃金價格走勢分析，金價下跌其實有兩個關鍵因素：
1. 避險情緒消退：原本預期美國大選會有爭議，令到避險情緒升高，金價一路升，但結果特朗普最後確定當選，市場風險減少，避險需求自然退場。
2. 美元走強：特朗普再次當選後，美元變得更強，資金大量湧入美金，尤其係美元對非美元買家，金價吸引力就唔夠啦。
黃金仲可以繼續買入？
池水先生表示，如果美國通脹能夠繼續回落，市場對 12月降息嘅預期增強，金價仲有機會再挑戰 2730美元。而且，摩根大通都話，儘管金價短期回落，但從長遠睇，黃金基本面仍然強勁，美國聯準會（Fed）降息週期、全球央行對黃金嘅需求，仲有貨幣貶值交易三大因素仍然存在。
睇翻整體大環境，中國央行已經連續六個月停止購金，再加上特朗普當選引發嘅對美國降息路徑嘅疑慮，金價趨勢有啲轉弱，尤其係美國大選後避險情緒消退、俄烏戰爭同中東局勢有冇因為特朗普上任而緩和，可能會影響避險資金流出；加上美元指數穩定，台銀預期金價可能會回測 2600美元，但如果通脹回落，強化降息預期，金價仲有機會挑戰 2730美元。
黃金市場整體趨穩
講返香港，年尾唔少人計劃拉埋天窗，整體金飾需求會有增長。有計劃結婚嘅新人會覺得 “金價低返啲，啱啱係買金飾嘅好時機”，所以整體市場可能比較穩定。
總括來講，黃金價格仍然受多方面因素影響，無論係美元走勢、避險情緒，定係年尾新人嘅金飾需求，大家都要密切留意金價漲跌，唔好錯過最佳入市時機啦！