海洋公園2023至2024財政年度業績最近公佈，雖然入場人次與總收入都有顯著增長，但依然無法擺脫虧損困境，虧損金額達7160萬元。未計算政府資助、折舊、減值撥回和投資收入在內，經營虧損淨額逾2億9千7百萬元，連續第3個年度收窄。講經MAN睇來，海洋公園顯然還有唔少功課要做，需要努力改善財政狀況
總收入同入場人次大幅增長
今次公佈的業績統計時間為去年7月1日至今年6月30日，指出海洋公園總收入按年增長41%，達到11.81億元；入場人次由236萬增至314萬，升幅達33%，創下近五年新高。無可否認係「復常大潮」下嘅好現象，門票收入按年增加54%，商品銷售收入和餐飲收入分別上升27%及32%，人均消費錄得6%按年升幅，反映大眾對公園的回流。
旅客來源變化顯著，印度及內地客大增
另一個亮點係，海洋公園成功吸引咗更多來自中國內地及印度嘅旅客。內地旅客增長3.55倍，印度及菲律賓分別增長4.12倍及2.26倍！數據顯示出，海洋公園經營確實有所突破以及香港作為旅遊目的地嘅吸引力。
但其實，海洋公園都需要思考如何繼續保持高速增長，把握現有內地+印度及菲律賓市場，同時拓展多元化嘅國際市場，特別係東南亞同歐美等地。
收入增長帶來助力，但成本上升亦不容忽視
隨住疫後復常，園區運營規模增大，海洋公園雖然收入大幅增長，但經營成本亦升至14.78億元，增幅高達17%。值得注意嘅係，保育及教育方面支出持續增長達到4.38億元，占總經營成本三成。講經MAN認為保育及教育工作就係海洋公園長遠發展基礎，如果可以將該工作同遊客體驗更好結合，可能會幫助提高公園整體盈利能力。
展望未來：大熊貓熱潮能否成為突破口？
海洋公園主席龐建貽提到，2024至2025年度將利用6隻大熊貓嘅契機，全面推動熊貓熱潮吸引更多遊客入場，並推動香港熊貓旅遊發展，從而減少海洋公園對公共財政嘅依賴。
講經MAN覺得大熊貓確實富有吸引力，尤其對於有小朋友嘅家庭，但係，單單依賴大熊貓熱潮，能否撐起海洋公園長期發展？海洋公園應該積極探索更多創新元素，融入更多元文化、教育同娛樂體驗，才能更好保持長遠吸引力。
小結
總結來講，海洋公園喺疫情後無論係收入定係入場人次確實有明顯增長，但面對持續財務虧損與成本問題，海洋公園仍要尋找更多創新嘅收入來源，否則增長可能會遇到瓶頸。講經MAN希望海洋公園未來可以更好地平衡發展與可持續性，繼續成為香港旅遊地標！