香港經濟困境一片，最近文化體育及旅遊局局長楊潤雄因「美斯之亂」同「郵輪碼頭荒廢」等問題，屢次受市民同媒體批評。特首李家超12月4日公開發言，如果香港唔改革，就會被淘汰。隨即12月5日，中國國務院宣佈，根據李家超提名同建議，免去林世雄運輸及物流局局長，仲有楊潤雄文體旅局局長職位，兩個職位分別由陳美寶與羅淑佩接任。
其中，羅淑佩曾因打擊濫用公屋同富戶政策而受到市民好評，同時仲係Mirror成員Ian（陳卓賢）忠實粉絲。講經MAN推測，羅淑佩唔單止行政能力強，仲有能力推動香港演唱會經濟，表現有機會超「我冇Taylor Swift電話」嘅楊潤雄。
【相關閱讀】
香港財赤破千億 公務員加薪惹爭議 政府開源方式：學費及急症室加費
香港經濟改革 首次問責局長被「炒魷魚」？
自香港回歸後，第一次有兩個問責局長被換職。特首李家超與陳美寶、羅淑佩兩位新局長會見傳媒，記者問到更換局長原因，李家超回應，佢經過一段時間觀察，並判斷他未來要做的工作，要有甚麼團隊，可以創造更大效益及最有效施政。李家超仲強調，香港經過疫情同黑暴之後，浪費咗唔少時間，現在要「追時間」，趕返個經濟。佢希望新團隊可以幫市民做多啲事，創造最大嘅經濟價值。
同時，特首李家超都讚過兩位新局長，話佢哋唔單止有好嘅解說能力，仲好主動，符合佢施政理念，兩位加入之後，政府會更加團結，為香港作出更大貢獻。當記者問到羅淑佩未必有文體旅局經驗嘅時候，李家超話，世界上冇人係全知全能，局長最緊要係有素質、有幹勁同領導能力，尤其係要學識帶領團隊，解決問題，幫助下屬應對挑戰。
楊潤雄表現早已遭人不滿
楊潤雄被免去局長職務後，喺社交平台回應指，「謝謝大家關心，天空海闊，踏上人生另一階段」，並附上一張維港照片。
經濟發展規劃滯後
其實，楊潤雄被換職早有先兆，喺今年10月，特首李家超就已喺施政報告中公開批評楊潤雄，話佢未有如期推出《文藝創意產業發展藍圖》，語氣相當嚴厲。事實上，旅遊界同立法會議員，包括葉劉淑儀，都批評楊潤雄，話佢冇積極聯絡國際歌手及邀請Taylor Swift來港，錯失演唱會經濟機會。此外，楊潤雄未有做好郵輪碼頭發展，任由商舖結業，碼頭形同荒廢，亦受到唔少外界批評。
「美斯之亂」盛事變瘀事
再講返「美斯之亂」，今年2月，政府撥1600萬公帑吸引阿根廷球星美斯跟隨美職聯球隊國際邁阿密來港進行表演賽，借此刺激旅遊業。但表演賽美斯根本無出場，令盛事變瘀事，球迷激嬲。後來政府撤回1600萬津助，並要求主辦商退球迷一半款，但楊潤雄表現仍遭人詬病。
羅淑佩新角色：帶領香港經濟發展 文體與旅遊
羅淑佩係新任文體旅局局長，過去係運輸署署長，亦係房屋局常任秘書長，有多年公職經驗。羅淑佩指出，文化、體育同旅遊都係非常重要嘅政策範疇，佢認為體育方面最迫切嘅工作就係做好啟德體育園啟用前準備，包括測試同演練，確保啟用順利。仲有，佢話會努力辦好全運會，畀香港運動員有個展示實力嘅平台。
羅淑佩亦強調，旅遊業對香港經濟至關重要，可以帶動零售、餐飲、景點、酒店、交通等多個行業，仲關乎大量從業員生計。佢希望香港能透過創新與中央支持嘅政策，如「一簽多行」，再創香港旅遊業高峰，令到「香港無處不旅遊」唔再只係口號。
同時，羅淑佩還係lan忠粉，對於追星遭批評曾表示： 「一個好似我咁嘅年紀、做我呢啲工嘅人，原來好似唔係好應該鍾意一個年輕啲嘅香港歌星或歌手？係咁㗎咩？唔係一向都講俾人聽咩？我後生鍾意譚詠麟，到而家佢全部碟齊晒，所以我覺得好自然啫。」
【相關閱讀】
2025香港演唱會：周杰倫、Coldplay啟德開唱！林峯、Dear Jane重踏紅館！（持續更新）
新任運輸局長陳美寶 重點工作曝光
陳美寶於1989年加入政府政務職系，之後擔任過運輸署署長（2017至2020年）與運輸及房屋局常任秘書長，喺香港運輸業務方面經驗豐富，關於未來施政方向講經MAN亦充滿期待，希望可以有效改善香港交通經濟。
新任運輸及物流局局長陳美寶表示，未來將會帶領團隊積極推動本港交通運輸基建工作，包括加速發展本地鐵路項目，例如東涌東延綫、小蠔灣站、屯門南延綫等，而北環綫第一期古洞站工程已開始，預計到2027年一系列嘅鐵路項目會陸續落成，改善香港交通網絡；跨境鐵路項目方面，政府會加快推展港深西部鐵路洪水橋至前海，以及北環綫支綫，利用內地推動基建項目嘅優勢，加速香港同內地嘅交通聯繫，提速提效；另外，陳美寶亦強調道路基建發展，特別係貫通九龍東西嘅中九龍幹線，預計明年底完成。佢話會督促有關部門，做好通車配套安排，確保市民可以順利通行。
林世雄任內業績麻麻
前運輸及物流局局長林世雄任內政績其實唔算好，諸多表現，引來市民不滿。佢曾推出三隧分流方案同港車北上等措施，但實施過程唔少問題。例如，「易通行」計劃推出前，唔少司機都話安排太倉卒，申請程序複雜，結果政府都要押後實施日期。
除此之外，林世雄任內工程項目超支，其中興建沙田T4號主幹路，最新估價約71億，遠超2006年提議嘅11億，立法會議員就勁批，話超支幅度太離譜，結果局方喺財委會開會前撤回撥款申請，最後將撥款金額壓縮到68.1億後才通過。
再講返去年颱風「小犬」襲港期間，機場大批旅客滯留，遊客等的士等到通宵。事後，林世雄承認，話機場人流管理需要進一步優化。
講經MAN認為，此輪換職反映香港政府喺經濟復甦和改革上的急迫性，特首李家超強調新團隊需具備解決問題和提升行政效能的能力，以加快經濟增長和創造更多就業機會，甘未來我地一齊期待香港越來越精彩。