講經MAN留意到政府最近有新動向,針對綜援受助人,政府預計2025年9月推出新計劃,要求失業人士每周要參加一次「無償工作」,每次至少一個鐘,直到搵到有薪工作或者重返主流教育。最特別嘅係,如果唔遵守規定,受助人同佢哋嘅家庭會被停發7日綜援金。
11月22日,政府喺立法會福利事務委員召開特別會議,詳細交代新計劃。會議中,唔少議員都提出關注,擔心新計劃能否真係幫助失業受助人提升技能、搵到工,再返重社會。而有啲議員就話,政府唔好只顧住推計劃,仲要記住照顧受助人嘅尊嚴,唔可以淨係要求佢哋做無償工作,仲要考慮發津貼俾佢哋。
社署計劃——「失業受助人士支援計劃」
現時,15至59歲嘅健全失業綜援受助人,冇合理理由唔做嘢(例如唔係因為照顧小朋友或者家有重病人士),就需要參加「就業支援服務」,包括同非政府機構個案管理員見面,仲要持續求職。
「就業支援服務」將會喺2025年9月完結,社署計劃推行一個為期兩年嘅「失業受助人士支援計劃」,打算改變現有服務方式。據政府所講,新計劃目標係透過要求受助人每星期參加無償工作,幫佢哋提升工作技能,重投職場。
【相關閱讀】
【失業救濟金2024】點樣申請?領取資格逐步拆解,教你一步步攞到援助過難關!
現有「就業支援服務」 唔係太理想
現有「就業支援服務」目標成效未夠理想,根據資料,非政府機構五年半內要幫助至少25%受助人搵到工作達一個月、至少20%受助人重返主流教育持續就讀三個月。不過,截至9月底,成功比例分別係22.8%同17.9%。而2023/24年度參與服務嘅有1.6萬人,但成功就業達一個月只有1800人;2024年4月至9月,參與人數降到1.2萬,成功就業達一個月僅約830人。
「無償工作」 就業培訓or佔便宜?
政府認為通過每周一小時工作,可以幫助失業受助人養成工作習慣,提升社交技能,甚至提示合作能力。勞工及福利局首席助理秘書長陳雅詠話會上提到,特別係年長同低學歷人士就業能力相對較弱,透過無償工作,有機會重新適應工作環境,培養更多工作技能。
但議員周小松就提出質疑,認為新計劃唔提供專門技能培訓,單單做無償工作真係可以提升就業能力咩?仲問到,提供工作嘅機構,會唔會因此可以得到免費勞動力?即係話,「無償工作」可能變成機構佔便宜手段。
陳雅詠回應話,現時再培訓局同勞工處都提供相應技能培訓,藉此分工避免資源重疊。至於提供無償工作嘅機構,同樣要投入人力監督受助人嘅工作,唔會純粹為咗慳錢而利用免費勞動力。
受助人尊嚴:唔係奴隸
議員江玉歡就指出,現有「就業支援服務」停滯,改革固然好,但政府唔可以只顧住推行計劃,仲要諗吓點樣尊重受助人基本權利。佢講到,「受幫助對象都有權利、有尊嚴,唔係拎左政府錢就咩都要去做。」
社署助理署長馬秀貞指出:「安排無償工作那方面,我們會和參加者大家去溝通,所以過程中,大家都會商量和安排。」講經MAN覺得呢點都好重要,如果政府推行新計劃同時都尊重受助人,而唔係只做表面功夫,都不失為一個好方法。
評論炸開 你點睇?
「失業受助人士支援計劃」引發港人熱烈討論,唔少網民都大讚計劃好,「靚波」、「一早要啦」、「加埋KPI」,甚至有網民話,無償工時太少,又話罰則太輕,「得一粒鐘,最少都半日啦!」、「咁都做唔到cut晒佢哋啲綜援!」、「最少都要5日,每日仲要8粒鐘!」。
至於工種,比較多網民支持清潔香港與送外賣,「應該判晒佢哋去做啲超厭惡性工作,每個月返一禮拜洗公廁,掃街,去公屋例垃圾,比啲機會佢哋學嘢」、「義工接單送外賣,振興香港外賣;市容隊,全港每日掃街一次」、「揾佢哋執垃圾、洗廁所都好有用」。
但亦有網民擔心管理綜援人士都需要行政成本,「為咗慳10蚊,結果多咗100蚊行政費」反而得不償失。
小結
總括來講,「失業受助人士支援計劃」係想透過「無償工作」幫助失業受助人重返職場,政府應該繼續聽取各界意見,做到既幫到人,又唔損害佢哋尊嚴,更好實現一個公平又有成效嘅支援計劃。